Anak Domba Bisa Ngomong
Mang Sahri boga domba danten bodas, nya montok nya beresih bubuhan asak urus. Mun jelema mah meureun geulis kasebutna. Atuda lain beresih awakna bae, dalah ka bujur-bujurna oge meni mohmoy, beureum jambu, matak pikauruyeun lalaki nu careraman. Ngan sarupa hanjakalna teh. Eta domba geulis teh teu daek reuneuh sakitu geus diingu salila-lila oge. Bajir boa disangkana ku Mang Sahri mah.
Hiji isuk waktu Mang Sahri moyankeun domba dantenna nu karek tas dimandian disabunan, lar aya Mantri Burahol ngaliwat. Duda Pa Mantri Burahol teh, da geus aya sataunna ditinggal maot ku pamajikanna
“Leuh montok oge dombana mah. Keur dipoyankeun eta teh Mang Sahri?” Mantri Burahol nanya bari ret deui-ret deui kana bujur domba Mang Sahri nu keur dipoyankeun. Bet ujug-ujug teh ngadadak ras inget ka pamajikanna nu geus jenat ninggalkeun.
“Aeh muhun Pa Mantri …. Ngan hanjakal montok oge bet teu anakan-anakan ieu teh. Duka pibajireun kitu ...?” tembal Mang Sahri.
“Bajir? Lah piraku sugan. Cing urang pariksa hayang nyaho …,” ceuk Mantri Burahol. Terus manehna ngadeukeutan domba tea, ceg buntutna disingsatkeun, breh nu ambucuy kawas beureum jambuna tea, diteuteup salila-lila.
“Kumaha Pa Mantri kinten-kintenna?” ceuk Mang Sahri teu sabar.
“Wah moal asana mah, Mang Sahri, moal bajir. Kaciri tina bujurna oge …,” walon Mantri Burahol.
“Nya nuhun atuh moal bajir mah …,” Mang Sahri kacida bungaheunana.
“Ayeuna mah kieu wae atuh. Ieu domba anteurkeun wae ka kandang domba kuring nu di tukangeun imah tea. Urang hijikeun jeung Si Jalu meunang tilu peuting mah. Ambeh di ditu mah aya obatna ongkoh keur nyuburkeun pianakeunana. Seug ayeuna mah kuringna rek ka kantor heula,” ceuk Mantri Burahol bari ngaleos ka kalerkeun.
“Euh nuhun pisan atuh pami kitu mah Pa Mantri. Mangga ayeuna keneh ge ku abdi di ka ditukeun,” ceuk Mang Sahri tambah bungah.
Teuing dikumaha-kumahana mah ku Mantri Burahol teh, ngan nu sidik teu lila ti sanggeus diendongkeun di kandang domba manehna, domba danten Mang Sahri teh enya wae terus reuneuh, sarta ku bungah-bungahna, waktu eta domba rek ngajuru teh, gancang wae Mang Sahri ngabejaan ka Pa Mantri Burahol sakalian hayang disaksian ngajuruna cenah mah.
Ngan heran sajeroning nyaksian domba Mang Sahri ngajuru teh, hate Pa Mantri Burahol mah ngarasa dagdigdug teu puguh. Sok sieun-sok sieun, pikirna, anak domba Mang sahri teh kawas ….
“Euleuh, tingal Pa Mantri, huluna geus rek bijil …!” ceuk Mang Sahri bari nunjuk kana bujur domba dantenna nu keur ngaheujeun.
Atuh Pa Mantri Burahol oge matana mani manco-manco wae ngawaskeun anak domba nu rek kaluar tina palawangan indungna. Barang jebrol huluna peresis hulu domba, “Alhamdulillah …. Hulu domba teh peresis hulu domba, teu kawas hulu kuring …,” cek gerentes Mantri Burahol jero hatena.
Kitu deui barang nu kaluar teh awakna, terus sukuna, terus sabeuleugeunjeurna peresis awak anak domba, hate Pa Mantri Burahol nu ti tatadi degdegan teh ayeuna mah ngadadak ngemplong. “Alhamdulillah …., sagalana peresis anak domba, teu saeutik ge kawas kuring ….,” cenah gerentesna bari ngusapan dada tandataning bungah kacida, siga nu tas salamet tina kawiwirangan.
Geus kitu mah atuh gancang gancang wae manehna pamitan ka Mang Sahri, alesan mah rek buru-buru ka kantor bisi beurangeun teuing.
“Tah da ayeuna mah geus salamet nya Mang Sahri, kuring rek permios wae …,” pokna bari indit.
Tapi can ge sabaraha lengkah, ujug-ujug teh anak domba Mang Sahri disada.
“Bappaaaa ….!” cenah sorana tarik kawas budak ngagegero bapana.
Puguh wae Pa Mantri Burahol meni curinghak bawaning kaget. “Beduss …! Na sia teh nyaho ti saha yen aing bapa silaing …??!” cenah bari leumpangna ngahaja digancangkeun da embung ngadenge anak domba Mang Sahri bapa-bapaan …!* (Mang Opa Mustopa)
