TEPAS

Komisi
Gratis | Bisnis Online Tanpa Modal

Ngamumule Basa Sunda 
Teu Kudu Ngadagoan Bantuan Ti Pamarentah
Ku: Sumartha

Hirup-huripna hiji basa gumantung kana dipiara henteuna eta basa ku nu bogana. Nya kitu deui basa Sunda. Satungtung basa Sunda masih aya keneh nu makena, bari terus dipiara tur dimumule ku urang Sundana sorangan, lain ku batur sumawonna ku deungeun-deungeun, insyaallah basa Sunda bakal tetep hirup. Basa Sunda moal tumpur, saperti kalolobaanana nasib basa daerah nu aya di sakuliah Nusantara ieu.

Apan sakumaha nu kungsi diwartakeun ku Logay , tina sajumlah rewuan basa daerah nu aya di Indonesia ieu, ngan tinggal 742 basa daerah nu kiwari masih keneh hirup. Kitu ge tina jumlah sakitu teh ngan kari 13 basa daerah wae anu jumlah nu ngagunakeunana leuwih ti 1 juta urang. Hartina, 729 basa daerah sejenna deui mah nu makena rata-rata geus kurang ti 1 juta urang, malahan cenah aya di antarana anu dipakena ngan ku saurang dua urang wae.

Sukur alhamdulillah basa Sunda mah teu nepi ka kitu. Urang Sunda nu nyararita ku basa Sunda masih keneh lobaan, pangpangna urang Sunda nu caricing di pilemburan. Tapi urang-urang Sunda nu jaradi menak jeung sarakola di pakotaan oge, anu sok ngarasa gengsi lamun nyararita ku basa Sunda ku sabab era sieun disebut urang kampung atawa kampungan, ari ngimpi mah cenah angger keneh ku basa Sunda ... (hahaha ...!) Hartina, basa Sunda teh masih keneh ngakar di masarakat turta hirup dina ati sanubari urang Sunda.

Sanajan kitu, teu mustahil basa Sunda oge laun-laun bakal tumpur saperti basa-basa daerah sejenna, saupama teu bener-bener dipiara tur dimumule. Saha tah nu kudu ngamumulena?

Tong ngandelkeun pamarentah

Nu wajib ngamumulena teh, cek tadi ge, nya urang sorangan nu ngaku sekeseler urang Sunda, minangka nu bogana. Lain batur, lain deungeun-deungeun. Sabab batur deungeun-deungeun oge sarua, ngabogaan tanggungjawab ngurus banda budayana sewang-sewangan. Nya kitu deui tong pati ngandelkeun teuing kana bantuan ti pamarentah, sanajan ayeuna (geus 67 taun) nu jadi pamarentah teh lain batur, lain bangsa deungeun-deungeun nu bareto ngajajah urang, tapi bangsa urang sorangan, samalah dulur urang keneh, nya eta urang Sunda sorangan! Naon sababna?

Memang enya, ari sacara konstitusional atawa paundang-undangan mah, basa Sunda teh (sarua jeung basa-basa daerah sejenna di sakuliah nusantara), mangrupa basa resmi kadua sanggeusna basa nasional - basa Indonesia - nu wajib dimumule ku nagara dina raraga ngadeudeul tur mengkuhan kabudayaan nasional. 

Naon sababna kabudayaan daerah jeung kabudayaan nasional urang kudu pengkuh, eta pikeun mertahankeun ciri, identitas sarta ajen kapribadian bangsa urang salaku bangsa Indonesia. Lamun teu kitu bangsa urang bakal moal puguh tangtunganana. Ngaranna mah enya angger bangsa Indonesia, ngan jiwa, sikep, tur kapribadianana mah geus lain jiwa, sikep, tur kapribadian urang Indonesia deui. Mungkin wae ngaran jeung awak mah potongan urang Indonesia, tapi jiwa, kapribadian katut kalakuanna mah geus robah jadi urang Amerika, urang Israel, atawa urang Yahudi upamana.

Tapi naha bisa pamarentah diandelkeun pikeun ngarumat tur ngamumule basa daerah dina hal ieu basa Sunda? Ceuk kuring mah tong pati diandelkeun teuing! Ari sababna nya eta:

Kahiji, pamarentahan urang salila ieu can bener-bener ngabogaan political will nu kuat pikeun ngamumule basa Sunda, nu dibuktikeun ku mangrupa kawijakan budgeter (anggaran nu gede pikeun ngamumule basa Sunda), kawijakan kurikuler (nularkeun pangajaran basa Sunda di sakola-sakola ti mimiti Taman Kanak-Kanak (TK) nepi ka Paguron Luhur), sarta kawijakan konservatorial  pikeun ngamaneuhkeun panggunaan basa Sunda di lingkungan sakabeh intansi pamarentahan reujeung sakabeh elemen masarakat.

Kadua, pamarentah (sanajan di jerona diwengku ku urang-urang Sunda) salila ieu can bisa mosisikeun basa Sunda satata (sarua pentingna) jeung widang-widang sejenna, kayaning olahraga jeung sajabana. Malahan kaya-kaya nu diskriminatif . Misalna wae, upama olahraga di daerahna henteu maju, pasti ngarasa era tur wirang. Tapi teu kitu ka basa Sunda mah. Rek maju rek henteu, malahan rek tumpur pisan oge, nya kumaha karep teh teuing. Padahal anu nyieun aturan sangkan basa Sunda (malahan aksara Sunda pisan) kudu bener-bener dipiara teh nya pamarentah sorangan. Jadi hartina dina hal ieu pamarentah sorangan teu konsekwen.

Katilu, sacara moral para para pajabat pamarentahan (sigana kaasup para anggota dewan oge) nu padahal manehna teh urang Sunda, oge can bisa mere conto nu hade sarta nyontoan langsung enggoning ngamumule basa Sunda. Siga nu heueuh jadi urang Sunda jeung ngajak ngamumule basa Sunda teh ngan di mana tepung dina konperensi basa Sunda jeung gempungan-jempungan kasundaan sejenna wae; geus balik ti dinya mah nya biasa deui bae. Di bumina masing-masing tara nyarios ku basa Sunda, sumawonna di kantor jeung dina kagiatan sapopoena. Matak teu aneh lamun disuguhan media-media basa Sunda oge (boh koran boh majalah, angot buku mah) moal kalersaeun 'nuang', da teu sarenengeun tea!

Jadi alhasil, miara tur ngamumule basa Sunda eta teu kudu ngandelkeun wae ka pamarentah, sumawonna pamarentah sorangan ge kiwari teh pan beuki loba uruseun. Mending oge prak langsung garap ku urang sarerea, sakur nu mikacinta basa Sunda katut lemahcai Ki Sunda. Kaasup oge lembaga-lembaga kasundaan, kayaning Lembaga Basa jeung Sastra Sunda, jeung Paguyuban Pasundan. Ulah mung aya jugrug namina wae, ari kagiatanana mung saukur lima taun sakali, ti konperensi ka konperensi, bari hasilna ukur satumpuk rekomendasi nu palaksanaanana teu ngaler teu ngidul. Kalah ka miceun biaya weh gede, ngatik miliaran! Lebar! Batan kitu mah mendingan parasihkeun we ka Ki Logay , sabatae pikeun ngamodalan media basa Sunda nu pangmajuna di Tatar Sunda. Sanggem lah asana teh ....!*